السلام عليكم ورحمة الله وبركاته
اليوم راح اتكلم عن منتجات ماركة أنقلوت ما أشوفها مشهورة كثير بس اهي تقريبا نفس ماك
واسعارها حلوه نفس ماك قبل هبة البنات فيها وارتفاع اسعارهم
قبل أشتري منهم سويت سيرش عشان أشوف المنتجات اللي يمدحوها كثير
أنا دايم قبل أشتري شي لازم أكون قاريه عنه
ف حطيت ببالي اشياء ورحت لهم بعض الاشياء مالقيها وبعضهم لقيتهم
أكثر شي يمدحونه البنات عندهم اللي يسموها القطرة السحرية بس ما اخذتها لاني ما أحس اني احتاجها
راح أوريكم مشترياتي ب مرتين رحت لهم
مشتريات المرة الأولى كانت ( مناكير - أوراج - هايلايت )
المناكير نوعهم اللي لما يجف يكون مات حبيته حبيته من جربته
ألوانهم حلوة وناعمة وبسرعه تنزال ماتتعب مع الازالة
واسعارهم حلوة وجودتهم حلوة والفرشة تبع المناكير سهلة
هذي أكثر نقاط اركز عليهم لما أجي ابي اشتري مناكير
الهايلايت شريته بعد مدح مايا احمد باليوتيوب وبعد ماشفتها لما تحطها كيف جميلة
حلوة كثير بعض البنات مايحبونها لانها فيها حبات قليتر بس انا أحب هالشش فيها لان بعد ما احطها
حبات القليتر تندمج مع البشرة وتصير كأنها لمعة الموية مادري كيف أشرحها لكم بس عجيبه
تستخدم للبودي والعين والفيس حلوة لمدمع العين
تشبة ماري لو بس أقوى منها الدرجة اللي أخذتها مثل ماهو واضح بالصورة رقمها 01
وأسمها وواضح بالصورة
شايفين كيف حبات القليتر بالصورة
لونها نفس لون ماري لو لما تندمج ع البشرة هنا مبين كأنه برونزي بس هو مو كذا
جربوها بالمحل قبل ممكن ماتعجبكم
هذي الألوان اللي حبيتها راح ابدء من اليمين
1- لونه عودي ع بني تقريبا رقمه 410 مات ثقيل
أرواج انقلوث ثقيله حيل بس حلوة وتحتاج تريب قبلها وماتنفع للشفايف اللي تتقشر ابدا
2- لونه خوخي أو برتقالي ع وردي بس مو فاقع رقمه 124
قوامه مو مات وكريمي وفيه لمعه خفيفه
حلو للصيف لونه شوي جاي ع وردي
3- لونه بنفسجي ع عنابي جميل جميل ع الشفايف رقمه 420
مات نفس الروج الأول ثقيل بس لونه عجيببب
بعد ماجربت المشتريات الاولى تحمست أجرب منهم منتجات أكثر وشريت هالاشياء
أحلى شي بأنقلوت وتتميز فيه أنك تقدرين تأخذين منهم علب فاضية وتحطي اللي تبيه فيهم
ميك أب فور أيفر ومات عندهم هالشي بس محدود ع الأيشدو تقريبا
اما انقلوت تقدرين بالارواج والايشدو والبلاشر والباودر
وهالشي حبيته كثير
هالباليت سويته للطلعات والسفرات حطيت فيه تدرجات البني للحواجب وكمان للعين لاني طايحه بلوك جميل حيل
وحطيت فيه شدو تدرجات البيبي بينك للجفن عشان مايصير لونه ابيض من الفاونديشن أو البرايمر ماحبه ابيض
واللي بعده روج لونه افتح من كذا لما احطه كأني مو حاطه شي ومات لونه نفس الشفايف تقريبا ويصير احط عليه قلوس اللون اللي ابي
أو احط روج لونه وردي بوسط الشفايف احب كذا يعطي لوك حيوي 💞
وبلاشر لونه يجنن وفيه شيمر خفيف ماكان ودي اختار لونه فيه شيمر لاني حابه الباليت يكون عملي للطلعات السريعه وللشنطة
بس اللون جميل حيل ماقاومته 💘
وكمان فيه باليت فيه بودر و ثلاث أماكن للشدو أو الروج يصير باليت عملي وصغير للطلعات وللشنطة
شريت باليت وحطيت فيه باودر فاتح وغامق الكونتور
اول مره اجرب الباودر تبعهم فيه درجات مختلفه للكونتور أخذت اللي يناسبني
Inglot HD powder
بعد تجربتي لها اقدر اقول انها حلوة
تغطيتها كبودر جميلة ومو ثقيلة وتعطي إضاءة
أما الكونتور لونه حلو وجاي ع رمادي مو نفس الصورة مبين كأنه برونز
حبيت شي فيه أو قصدي أكثر شي حبيته فيه انه يندمج بسهولة
والباودر اافتح مني بدرجات عشان استخدمه للاضاءة تحت العين والاماكن اللي ابي ابرزها
وأكثر ثاني شي حلو فيه حجمه بالنسبة لأغلب باليتات الكونتور اللي تجي كبيرة فجحمه صغير
طبعا فيه ألوان مختلفة بالنسبة للبودر اللي هي الإضاءة والباودر اللي لتحديد للملامح تختارو ع حسب اللي يناسب لونكم
عجبتني تركيبهم ف حابه اخذ منهم بودر أو لوس بودر نفس لوني لكامل الوجه مو للاضاءة
وبس هذي مشترياتي منهم وأن شاء راح اجرب اكثر لان اشيائهم حلوة كثير
وكمان فيه شي ماصورته لما شريت الاشياء الاخيرة عطوني مناكير هدية
هم عندهم عروض مثلا لو شريتي 5 أوراج لك السادس مجانا
أو 4 أرواج لك الخامس مجانا مو ذاكره شنو بالضبط لان من زمان
وكمان لو شريتي بمبلغ معين يعطونك هدية انتي اللي تختارينها بس طبعا مو من كل المنتجات
فيه مجموعة شغلات انتي تختاري منها
كانت مناكير وعلب نفس اللي شريتهم ورموش هذا اللي أذكره
وانا اخترت المناكير
